عمر وسلمى ع الكورنيش...ممنوع الدخول لذوى الاحساس المرهف

عمر و سلمى ماشيين على الكورنيش .. الجو حار .. الشمس محرقة
سلمى : عطشانة

عمر : وأنا كمان

سلمى : يعنى ... عايزة اشرب

عمر : أكيد مادام عطشانة يبقى عايزة تشربي

سلمى : المفروض – بما أن عندك إحساس يعنى – إني لما أقولك عطشانة تجيب ليا حاجة ساقعة

عمر : ومين اللي هيحاسب ؟؟

سلمى : أنت طبعاً

عمر : منين ياحسرة .. ماانتى عارفة الكانز وغطاه

سلمى : ماقلتش عايزة كانز .. كفاية إزازة صاروخ

عمر : طب لو هاتجيبى اعزمينى معاكى .

سلمى : يابنى أنت مابتحسش ، وبعدين بقالنا 3 ساعات ماشيين ، أنت مش ناوي تقعدنا ولا إيه؟

عمر : عندك الكورنيش كله .. اختاري الرصيف اللي يعجبك

سلمى : قصدي تعزمنى في مكان شاعري

عمر : في الحر ده .. ماينفعش

سلمى : بلاش دى .. نأخد مركب عالكورنيش

عمر : المراكب بتغرق اليومين دول .. خلينا ع البر أحسن

سلمى : بلاش المركب تعالى نأكل ترمس .. أظن ده رخيص

عمر : إنتى تضمني منين إن الراجل غاسل إيده وغاسل الترمس

سلمى : أعوذ بالله .. إنت مقفلها كده ليه ؟؟

عمر : بصراحة معييش فلوس

سلمى : يا سلام!! .. ماأنت كان معاك إمبارح

عمر : إمبارح دخلت السينما مع بنت حلوة كده فالفلوس خلصت

سلمى : بنت حلوه ؟؟!! وبتقولها في وشى

عمر : أكذب عليكى يعنى

سلمى : لأ .. تحرق دمى أحسن

عمر: أنا مش شامم ريحه شياط يعني

سلمى : يخرب بيت البرود

عمر : برود إيه ؟؟ ماهو الجو مولع أهو

سلمى : إنت اللي بارد

عمر : بارد إزاى ؟؟ دا أنا بشُر عرق

سلمى : بقولك إيه .. روحنى

عمر : أروحك ؟! هو إنتى ماتعرفيش تروحي لوحدك

سلمى : آآآآه .. طب أنا ماشية

عمر : ليه يا حبيبتي؟؟

سلمى : حبك برص

عمر : والله البرص بيفهم عشان حبني

سلمى : بجد كده كتير

عمر : كتير إيه ؟؟

سلمى : إرحمنى .. واضح إن الحر بيجى معاك بالعكس .. يا بارد

عمر : يعنى مصممة تمشى ؟؟

سلمى: أيوة وحالاً كمان

عمر : طب استني لما نوصل آخر الشارع

سلمى : اشمعنى ؟؟

عمر : أصل أنا ساكن هناك .. و مايرضكيش أروح لوحدى

سلمى : لااااااااااااااااااااااا

عمر : ينفع كده ترمي نفسك في الميه مين هايوصلني بقى